అంగారకుడిపై పరిశోధనలు

* జీవం ఉనికి కనుక్కునే ప్రయత్నాలు 
* అట్లాస్‌ 5 రాకెట్‌ ప్రయోగించిన నాసా 
* ఆగస్ట్‌ 6, 2012న అంగారకుడిపై ల్యాండింగ్‌ 
* రెండేళ్ల పాటు పరిశోధనలు 
* రోవర్‌లో 17 కెమేరాలు 
* అధునాతన సైన్స్‌ ల్యాబ్‌ 

అంగారకుడిపై జీవం ఉందా ? మనుషుల్ని పోలిన జీవులు అరుణ గ్రహంపై ఎక్కడైనా ఉన్నాయా ? కనీసం అందుకు సంబంధించిన జాడలేమైనా తెలుస్తాయా అన్న లక్ష్యంతో నాసా ప్రయోగాలు చేస్తోంది. ఇందులో భాగంగా అట్లాస్‌ 5 రాకెట్‌ను మార్స్‌పైకి ప్రయోగించింది. త్వరలోనే రోవర్‌ నుంచి సానుకూల ఫలితాలు వస్తాయని నాసా భావిస్తోంది. సువిశాల విశ్వంలో మనల్ని పోలిన జీవులు ఎక్కడైనా ఉన్నాయా ? ఉంటే ఎక్కడ అన్న అంశంపై ఏళ్ల తరబడి శాస్త్రవేత్తలు సుదీర్ఘంగా ప్రయోగాలు చేస్తున్నారు. ఆ కోవలోనే అంగారకుడిపై అమెరికా అంతరిక్ష పరిశోధనా సంస్థ- నాసా సైంటిస్టులు పరిశోధనలు సాగిస్తున్నారు. 

లేటెస్ట్‌గా మార్స్‌పై ప్రయోగాల కోసం అట్లాస్‌ 5 రాకెట్‌ను ప్రయోగించారు. ఫ్లోరిడాలోని కేప్‌ కెనర్‌వాల్‌ అంతరిక్ష కేంద్రం నుంచి దీన్ని ప్రయోగించారు. న్యూక్లియర్‌ పవర్‌తో కూడిన రోవర్‌ను మార్స్‌పైకి పంపుతున్నారు. పరిమాణంలో బస్‌ అంత పెద్దదిగా ఉండే ఈ రోవర్‌ వచ్చేఏడాది ఆగస్ట్‌ 6న అంగారకుడిపై దిగుతుంది. అప్పట్నుంచి రెండేళ్లపాటు అక్కడే పరిశోధనలు నిర్వహిస్తుంది. మొత్తం 154 కిలోమీటర్ల పరిధిలో ఉన్న మట్టి, రాళ్ల శాంపిల్స్‌ సేకరిస్తుంది. వాటిని క్షుణ్నంగా విశ్లేషిస్తుంది. క్యూరియాసిటీ అనే ఈ రోవర్‌కు 17 కెమేరాలు అమర్చారు. 

అలాగే, మార్స్‌ నుంచి సేకరించిన రాళ్లు, మట్టిని విశ్లేషించేందుకు అవసరమైన సైన్స్‌ ల్యాబ్‌, ఇతర సాంకేతిక పరికరాలు ఇందులో ఉన్నాయి. అన్నీ అనుకున్నట్లుగా సాగితే త్వరలోనే రోవర్‌ నుంచి సానుకూల ఫలితాలు వస్తాయని నాసా భావిస్తోంది.