వైభవంగా బొత్స కుమార్తె పెళ్లి

 

విజయనగరం, నవంబర్ 2: రాష్ట్ర మంత్రి, ప్రదేశ్ కాంగ్రెస్ కమిటీ అధ్యక్షుడు బొత్స సత్యన్నారాయణ కుమార్తె సత్యశ్రీఅనుష వివాహ వేడుక శుక్రవారం రాత్రి విజయనగరంలో అంగరంగ వైభవంగా జరిగింది. రాష్ట్ర గవర్నర్‌తో పాటు తమిళనాడు గవర్నర్ ఈ వివాహవేడకకు హాజరై వధు వరులను ఆశీర్వదించారు. ముఖ్యమంత్రి ఎన్ కిరణ్‌కుమార్‌రెడ్డితో పాటు, కేంద్ర మంత్రులు జైపాల్‌రెడ్డి, పురంధ్రీశ్వరి, పల్లం రాజు, పనబాక లక్ష్మి, కోట్ల సూర్యప్రకాష్‌రెడ్డి, చిరంజీవి, నవదంపతులను ఆశీర్వదించారు. అలాగే రాష్ట్ర ఉప ముఖ్యమంత్రి దామోదర రాజనరసింహ, శాసన సభ స్పీకర్ నాదెండ్ల మనోహర్, డిప్యూటీ స్పీకర్ మల్లు భట్టివిక్రమార్క, శాసన మండలి చైర్మన్ చక్రపాణి వివాహవేడుకలకు హాజరైయ్యారు. రాష్ట్ర మంత్రులు సబితాఇంద్రారెడ్డి, గల్లా అరుణకుమారి, కె. గీతారెడ్డి, తోట నరసింహులు, అనంతరామనారాయణ రెడ్డి, ఎన్ రఘువీరారెడ్డి, పి. శ్రీ్ధర్‌బాబు, డికె అరుణ, సునీతా లక్ష్మారెడ్డి, కె జానారెడ్డి, ఆర్ వెంకటరెడ్డి, కె. ప్రతాప్‌రెడ్డి, పార్ధసారధి, డి మాణిక్యవరప్రసాద్, పినిపె విశ్వరూప్, వట్టి వసంత్‌కుమార్, గంటా శ్రీనివాసరావు, శతృచర్ల విజయరామరాజు, బాలరాజు, కొండ్రు మురళి ఈ వేడుకల్లో పాలు పంచుకున్నారు. అలాగే తెలంగాణా రాష్ట్ర సమితి ప్రతినిధులుగా కె తారాకరామారావు, కెసిఆర్ కుమార్తె కవిత, భారతీయజనతాపార్టీ రాష్ట్ర మాజీ అధ్యక్షుడు బండారు దత్తాత్రేయ హాజరయ్యారు. పార్లమెంటరీ కమిటీ ప్రతినిధి టి. సుబ్బిరామిరెడ్డి, ఎంపిలు ఉండవల్లి అరుణ్‌కుమార్, సాంబశివరావు, హర్షకుమార్, రాయపాటి సాంబశివరావు, మధుయాష్కి, రాజ్యసభ సభ్యులు కెవిపి రామచంద్ర రావు, హనుమంతరావు, నంది ఎల్లయ్య, శ్రీనివాసులు, వి వివేక్, 20 సూత్రాల కమిటీ చైర్మన్ తులసీరెడ్డి, దగ్గుబాటి వెంకటేశ్వరరావు, మాజీ ఎంపి ఆనందగజపతిరాజు హాజరయ్యారు.
ఫోటో... బొత్స కుమార్తె పెళ్లికి హాజరైన ముఖ్యమంత్రి, కాంగ్రెస్ సీనియర్ నేతలు

బొత్స కుమార్తె పెళ్లికి అధికార దుర్వినియోగం

హైదరాబాద్, నవంబర్ 3: పిసిసి అధ్యక్షుడు బొత్స సత్యనారాయణ కుమార్తె వివాహానికి అధికార దుర్వినియోగానికి పాల్పడ్డారని టిడిపి రాష్ట్ర ప్రధాన కార్యదర్శి అరవింద్‌కుమార్‌గౌడ్ విమర్శించారు. శనివారం ఎన్టీఆర్ భవన్‌లో ఆయన మీడియాతో మాట్లాడారు. రాజకీయ నాయకుల కుటుంబ విషయాలు, వ్యక్తిగత వ్యవహారాలపై మాట్లాడకూడదని కానీ బొత్స కుటుంబంలో పెళ్లి వల్ల ప్రజలు పడ్డ బాధలను దృష్టిలో పెట్టుకుని బాధ్యతాయుతమైన ప్రతిపక్షంగా విమర్శిస్తున్నట్టు తెలిపారు. వివాహానికి ఉత్తరాంధ్రలోని మూడు జిల్లాల ప్రభుత్వ యంత్రాంగం యావత్తు సొంత మనుషుల్లా పని చేశారని విమర్శించారు. పదిహేను రోజుల ముందు నుంచే రవాణాశాఖ, రెవెన్యూ శాఖ అధికారులు, ఉద్యోగులు బొత్స కుమార్తె వివాహ వేడుక బాధ్యతలో మునిగిపోయారని అన్నారు. నీలం తుఫాను కారణంగా రెండు లక్షలకు పైగా ఎకరాల్లో పంట నష్టం జరిగిందని వేలాది ఇళ్లు ముంపునకు గురయ్యాయి, వారిని ఏ అధికారి ఇంత వరకు పరామర్శించలేదని అన్నారు. కానీ కొద్ది రోజుల క్రితమే ఆర్‌టిఏ అధికారులు వాహనాలను పట్టుకొని డాక్యుమెంట్లు సీజ్ చేశారని, దాదాపు ఐదువందల వాహనాలను బలవంతంగా రప్పించి, అతిధుల కోసం వాడుకున్నారని ఆరోపించారు. విశాఖపట్నం, విజయనగరం, జిల్లా ప్రధాన రహదారిని మూసివేసి ఆర్టీసి బస్సులను భోగాపురం మీదుగా మళ్లించారని విమర్శించారు. ఆరు కిలో మీటర్ల అదనపు ప్రయాణానికి అధిక చార్జీలు వసూలు చేయడంతో భోగాపురం వద్ద ప్రయాణీకులు ధర్నా చేశారని తెలిపారు. నీళ్లు లేక రైతులు గగ్గోలు పెడుతుంటే బొత్స ఏకంగా 20 బోర్లను తవ్వించారని , రైతులకు రెండు గంటలు కూడా విద్యుత్ ఇవ్వకుండా పెళ్లికి మాత్రం పదిహేను రోజులుగా ప్రత్యేక విద్యుత్ లైన్లను తీసుకొని అధికార దుర్వినియోగానికి పాల్పడ్డారని అన్నారు. మూడు జిల్లాల విద్యుత్ మొత్తాన్ని పెళ్లికి ఉపయోగించడంపై పూర్తి స్థాయిలో విచారణ జరిపించాలని డిమాండ్ చేశారు. పెళ్లికి 700 మంది పోలీసులను ఉపయోగించారని విమర్శించారు.